چین پاکستان کے لیے جو کر رہا ہے وہ امریکہ نہیں کر سکتا، وزیر اعظم شہباز شریف

وزیر اعظم شہباز شریف نے کہا ہے کہ چین پاکستان کے لیے جو کر رہا ہے وہ امریکہ نہیں کر سکتا۔

گزشتہ روز صحافیوں سے غیر رسمی ملاقات کے دوران وزیراعظم شہباز شریف نے واشنگٹن کے ساتھ تعلقات کی بحالی کی ضرورت پر زور دیا تاہم واضح کیا کہ یہ بیجنگ کے ساتھ تعلقات کی قیمت پر نہیں آسکتا۔

وزیر اعظم شہباز شریف نے امریکہ کے ساتھ تعلقات میں بہتری کی اہمیت کا ذکر کیا کیونکہ یہ پاکستان کے بہترین مفاد میں ہے۔

انہوں نے کہا کہ میرا خیال ہے کہ امریکہ کے ساتھ ہمارے تعلقات کو ٹھیک کیا جانا چاہیے کیونکہ یہ پاکستان کے لیے بہت اہم ہے۔

وزیر اعظم شہباز شریف نے کہا کہ امریکہ کے لیے چین کے ساتھ دوستی پر سمجھوتہ نہیں کیا جا سکتا، دونوں تعلقات پاکستان کے لیے اہم ہیں۔ انہوں نے مزید کہا کہ “امریکہ وہ مدد نہیں دے سکتا جو چین پاکستان کو دے رہا ہے۔”

وزیر اعظم شہباز شریف نے بھی پاکستان میں چینی شہریوں کے تحفظ اور سلامتی پر تشویش کا اظہار کرتے ہوئے یقین دلایا کہ حکومت ان کی فلاح و بہبود کو یقینی بنانے کے لیے تمام وسائل بروئے کار لائے گی۔

مزید برآں، انہوں نے کہا کہ جب چین جیسے قریبی دوست کے ساتھ تعلقات کی بات آتی ہے تو سیاست کی کوئی گنجائش نہیں ہے۔