ہارورڈ یونیورسٹی کے سائنسدانوں نے دعوی کیا ہے کہ بڑے پیمانے پر آبادی کے کووڈ 19 کے فوری (ریپڈ) ٹیسٹ کیے جائیں توصرف 6 ہفتوں میں کرونا کو قابو کیا جاسکتا ہے۔
ہارورڈ میں ٹی ایچ چین اسکول آف پبلک ہیلتھ اور یونیورسٹی آف کولوراڈو بولڈر کے ماہرین نے20 نومبر کو شائع ہونے والی اپنی تحقیق میں دعویٰ کیا ہے کہ اگرچہ ریپڈ ٹیسٹ اتنے مؤثر نہیں لیکن ایسے لوگوں میں بڑے پیمانے پر انہیں آزمایا جاسکتا ہے جن میں کورونا وائرس سے متاثر ہونے کی کوئی علامت سامنے نہیں آئی ہے۔ اس کا فائدہ یہ ہوگا کہ لاک ڈاؤن کی ضرورت نہیں رہے گی اور اس طرح طبی اداروں کو اپنا مقصد پانے میں مدد ملے گی۔
کووڈ 19 کے تیزرفتار ٹیسٹ بہت کم خرچ ہوتے ہوئے منٹوں میں نتائج دیتے ہیں۔ اگر صرف امریکا ہی میں تیز رفتار (ریپڈ) ٹیسٹ کے ذریعے کورونا سے متاثرہ افراد کو شناخت کرکے انہیں دیگر لوگوں سے الگ کرلیا جائے تو وبا پر بند باندھنے میں غیرمعمولی کامیابی مل سکتی ہے۔
