راولپنڈی: پی ٹی آئی کے بانی عمران خان نے نئے انتخابات کا مطالبہ کردیا۔ راولپنڈی کی اڈیالہ جیل میں 190 ملین پاؤنڈز ریفرنس کی سماعت کے دوران صحافیوں سے غیر رسمی گفتگو کی۔
مخصوص نشستوں پر فیصلے سے متعلق سوال کے جواب میں عمران خان نے کہا کہ اب حکومت میں آنے کا کیا فائدہ، اسٹیبلشمنٹ کو صاف اور شفاف انتخابات کرانا ہوں گے، مخصوص نشستیں ملنے کے بعد ہم اس کا حصہ نہیں بنیں گے۔
واضح رہے کہ سپریم کورٹ نے سنی اتحاد کونسل کی مخصوص نشستوں سے متعلق پشاور ہائی کورٹ اور الیکشن کمیشن کے فیصلے کو کالعدم قرار دیتے ہوئے مخصوص نشستیں پی ٹی آئی کو دینے کا حکم دیا ہے۔
عدالت نے الیکشن کمیشن کے 13 مئی کے نوٹیفکیشن کو غیر آئینی قرار دے دیا۔ سپریم کورٹ کے اکثریتی فیصلے میں کہا گیا کہ کسی بھی جماعت کو انتخابی نشان سے محروم کر کے انتخابی عمل سے محروم نہیں کیا جا سکتا۔ سپریم کورٹ کے اکثریتی فیصلے میں قرار دیا گیا کہ پی ٹی آئی ایک سیاسی جماعت ہے جو خواتین اور اقلیتی نشستوں کی حقدار ہے۔
